ஸ்ரீதிவ்யா நடிப்பில் சமீபத்தில் வெளியான படங்கள் சரியாகப் போகவில்லை. சென்ற வாரம் வெளியான பென்சில் திரைப்படமும் பாக்ஸ் ஆபிஸில் தோல்வியே கண்டுள்ளது.

இந்நிலையில், மே 20 வெளியாகும் மருது படத்தையே அதிகம் எதிர்பார்க்கிறார்.

மருது பற்றி சொல்லுங்க...

பாக்கியலட்சுமி என்ற கதாபாத்திரத்தில் நடித்திருக்கிறேன். குணத்தில் ஆணைப் போன்ற வேடம். அதனை திறம்பட செய்ய இயக்குனர் முத்தையாதான் உதவினார்.

இந்த கதாபாத்திரத்தின் ஸ்பெஷல் என்ன...?

விஷாலின் காதலியாக வந்து மனைவியாகும் வேடம். கிராமத்து பெண். ராஜபாளையம் வட்டார மொழி பேசி நடித்திருக்கிறேன்.

விஷாலுக்கு தேசிய விருது கிடைக்காததற்கு வருத்தப்பட்டீர்களாமே...?

அவன் இவன் படத்தில் மாறுகண் உடையவராக விஷால் நடித்திருந்தார். அப்படி அதற்குமுன் யாரும் நடித்ததில்லை. நவரசம் காட்டும் காட்சியில் நடிப்பில் அசத்தியிருந்தார். அவருக்கு விருது இல்லை என்றதும் வருத்தப்பட்டேன்.

பேய் படத்தில் நடிப்பது எப்படி இருக்கிறது?

'சங்கிலி புங்கிலி கதவத் தொற' ஒரு பேய் படம். நான் நடிக்கும் முதல் பேய் படம் இதுதான். ஒவ்வொரு காட்சியும் இயக்குநர் வந்து சொல்லிக் கொடுப்பார். அதனால் எப்போதுமே பேய்ப் படம் என்ற எண்ணமே இருக்கும். திடீரென்று அந்த வீட்டின் ஜன்னலில் பார்த்தால் வெள்ளையா யாரோ போற மாதிரி இருக்கும். சில சமயங்களில் நானே பயந்திருக்கிறேன்.

காஷ்மோரா படத்தில் நயன்தாராவுடன் நடிக்கிறீர்கள். யாருக்கு என்ன வேடம்...?

அதெல்லாம் சொல்ல முடியாது, சஸ்பென்ஸ். நானும் நயன்தாராவும் நாயகிகள். இப்போதைக்கு அவ்வளவுதான் சொல்ல முடியும்.

நயன்தாராவுடன் நடித்த அனுபவம் எப்படி?

இதுவரை நயன்தாராவுடன் இணைந்து நடிக்கும் காட்சி வரவில்லை.

கார்த்தியுடன்...?

கார்த்தி சாரோட நடித்தது அருமையாக இருந்தது. ஏதாவது சொல்லிக் கிண்டல் செய்துகொண்டே ஜாலியாக இருப்பார். காட்சி என்று வரும்போது ஈஸியாக நடித்துவிடுவார்.

கார்த்தியின் ரசிகையாகிவிட்டீர்களா...?

இல்லை, நான் சூர்யாவின் பெரிய ரசிகை. சில்லுன்னு ஒரு காதல் தெலுங்கில் பார்த்தேன். அப்போதிலிருந்தே அவருடைய ரசிகையாக மாறிவிட்டேன்.

நற்பணிகள் அதிகம் செய்கிறீர்களே...?

அதுக்கு அம்மாவின் மனசுதான் காரணம். நான் கொடுக்கலாம் என்றாலும் என் குடும்பம் அதற்கு ஒத்துழைக்க வேண்டும். சென்னையில்தானே நான் இவ்வளவு பெரிய நடிகையாகியிருக்கிறேன். அந்த மக்களுக்குக் கொடுக்கும்போது சந்தோஷமாக இருந்தது. வெள்ள சமயத்தில் இந்த உலகமே அழிந்து போனால் எப்படியிருக்குமோ அந்த மனநிலையில்தான் இருந்தேன். ராஜபாளையத்தில் ஒரு கிராமத்தில் டாய்லெட் இல்லாமல் கஷ்டப்பட்டார்கள். விஷால் உதவலாம் என்றார், உடனே பண்ணினேன்.

நடிகர் சங்க விவகாரத்தில் நேருக்குநேர் மோதிக் கொண்டவர்கள் ராதாரவியும், விஷாலும்.

ராதாரவி எந்த பதவிக்கு போட்டியிடுவாரோ, அதே பதவிக்கு அவரை எதிர்த்து போட்டியிடுவேன் என்று கூறி, அவரை எதிர்த்து நின்று சங்கத்தின் பொதுச்செயலாளர் ஆனவர் விஷால். அவர்கள் இருவரும் ஒரே படத்தில் இணைந்து நடித்திருப்பது திரையுலகுக்கு மட்டுமில்லை ரசிகர்களுக்கும் ஆச்சரியம் கலந்த அதிசயம்.

மருது படத்தின் பிரஸ்மீட்டில் அந்த முதல் நாள் சந்திப்பை விஷால் விளக்கினார்.

"முத்தையா என்னிடம் கதை சொன்ன போது, குறிப்பிட்ட கதாபாத்திரத்துக்கு ராதாரவி அண்ணன் நடித்தால் நன்றாக இருக்கும், உங்களுக்கு எப்படின்னு தயங்கி கேட்டார். இதை கேட்க என்ன தயக்கம்? எந்த கதாபாத்திரத்துக்கு யார் பொருத்தமோ அவர்களை நடிக்க வைங்க. இதுவரை நாங்க சேர்ந்து நடிச்சதில்லைன்னு சொன்னேன்.

நடிகர் சங்க தேர்தலில் அவர் ஒரு கோணத்தில் நின்றார். நான் வேறொரு கோணத்தில் நின்றேன்.

அவ்வளவுதான். சங்கம் வேறு நடிப்பு வேறு. சங்கம் வேறு தொழில்வேறு. இரண்டையும் குழப்பிக் கொள்ளக் கூடாது. ராதாரவி அண்ணன் வந்தார் என்னைக் கட்டிப் பிடித்தார். 'இப்போது நிறைய தொடர்ச்சியாக படங்கள் நடிக்கிறேன். வீட்டில் மகிழ்ச்சியாக இருக்கிறார்கள். நடிகர் சங்கத்துக்கு எந்த உதவி தேவைப்பட்டாலும் சொல்லுப்பா செய்றேன்' என்றார். அவர் ஒரு மூத்த நடிகர். அவர் மரியாதைக்குரியவர் என்பதை என்றும் நான் மறந்ததில்லை" என்றார் விஷால்.

சரத்குமார் தலைமையிலான சங்க நிர்வாகிகளை எதிர்த்து போட்டியிட்டால் சங்கம் உடையும், பொறாமை வளரும், இருதரப்பும் சேர்ந்து நடிக்க மாட்டார்கள் என்று ஆவேசப்பட்ட சேரன், செல்வமணி எல்லாம் இப்போது என்ன சொல்கிறார்கள்...?